Эрон нефть экспорти ҳажмини бир суткада 2,3 млн баррелга етказди

Эрон президенти Хасан Руҳоний Теҳрон яқинидаги саноат корхонасига ташрифи чоғида, мамлакат нефть экспорти бир кеча-кундузда 2,3 млн. баррелга етгани хусусида баёнот берди.

"Эрон бир кунда 2,3 млн. баррель нефть ва газ конденсати экспорт қилмоқда. Бу Эрон Ислом Республикасининг олтилик (Эрон ядро дастурига оид музокараларда иштирок этган БМТ ХКнинг 5 доимий аъзоси ва Германия) билан имзолаган атом келишуви кучга кирмасдан аввалги кўрсаткичидан 2 марта кўп демакдир", — дея президент сўзларини келтиради Tasnim агентлиги.

Таъкидлаш жоизки, санкциялар бекор қилингунича, Эрон нефть компаниялари бир кунда 1 млн. баррелдан кўп нефть экспорт қила олишмаган. 

Эрон нефть вазирлиги маълумотларига кўра, 20 мартдан эътиборан Эрон нефть экспорти кунига 2 млн. баррелга етган эди. Апрель ойидан бошлаб қора олтин қазиб олиш кўрсаткичи кунига 400 мингга ортиб, 3,5 млн. баррелгача етган. Ислом Республикаси давлат бюджетида бир кеча-кундузда 2,25 млн. баррель нефть қазиб олиниши белгилаб қўйилган.