Peugeot компанияси "Дакар" учун янги прототипни намойиш қилди

Peugeot компанияси француз авто ишлаб чиқарувчисининг завод жамоаси пойгачилари ралли-рейдларда, шу жумладан "Дакар"да иштирок этадиган янги прототипни намойиш қилди. Ушбу модель 3008 DKR номини олди.

Прототип қувур рамаси атрофида қурилган. Peugeot 3008 DKR'нинг кузов панеллари карбондан ясалган. Автомобиль иккита амортизатор билан таъминланган. 

3008 DKR'нинг умумий узунлиги - 4312 миллиметр, кенглиги эса - 2200 миллиметрга тенг. Peugeot компаниясининг аввал фойдаланган 2008 DKR прототипи янгисидан 28 миллиметрга қисқароқ. Янги прототипнинг ғилдирак базаси 3000 миллиметрдан иборат. Автомобилнинг ёқилғи баки 400 литрни сиғдира олади. 

Прототипнинг қуввати 340 от кучига тенг. Автомобилнинг максимал тезлиги - соатига 200 километр. 

Peugeot автомобилни ишлаб чиқаришда Red Bull, Sparco, Total ва BF Goodrich компаниялари билан ҳамкорлик қилди. 

Мазкур прототипни биринчи бўлиб Карлос Сайнц синовдан ўтказади. Испаниялик пойгачи 3-7 октябрь кунлари Марокашда бўлиб ўтадиган ралли-рейдда Peugeot 3008 DKR'да иштирок этади. Ушбу пойгада Сирил Депре ҳам қатнашиб, у Peugeot 2008 DKR'ни бошқаради.