ЕИ Суриядаги вазият учун Россияни жазолашга тайёргарлик кўряпти

Суриядаги вазиятнинг кескинлашгани сабабли Россияга қарши жазо чоралари қўллаш масаласи ЕИ давлат раҳбарларининг Брюсселда бўлиб ўтажак саммити кун тартибига киритилган. Анжуман 20-21 октябрь кунлари Бельгияда бўлиб ўтади, дея хабар қилмоқда Bloomberg агентлиги ихтиёрига келиб тушган ҳужжатларга асосланган ҳолда. 

Унда хусусан, «Евроиттифоқ Сурия тузуми ва Россиянинг Ҳалаб шаҳридаги тинч аҳоли вакилларига ҳаво зарбаларини қоралайди». «Шу муносабат билан, ЕИ, агар зўравонликлар барҳам топмаса, жисмоний шахслар ва ташкилотларга қарши ҳар қандай чекловчи чораларни муҳокама қилиши мумкин», — дейилади баёнот лойиҳасида. 

19 октябрда Reuters агентлиги юқори лавозимли немис мулозимига таянган ҳолда, Россияга нисбатан янги жазо чоралари қўллаш мавзуси кун тартибида тургани, бироқ, ЕИ раҳбарлари бу ҳафтада ҳеч қандай қарор қабул қилмасликларини хабар қилган эди.