Кореяда инсон томонидан бошқарилувчи гигант робот прототипи яратилмоқда

«Korea Future Technology» компанияси инсон ҳаракати орқали бошқарилувчи оғир робот прототипини яратди. Роботни ишлаб чиқиш жараёнида иштирок этган 3D-рассом  Виталий Булгаров ўзининг Facebook'даги саҳифасида шу ҳақида маълум қилди. 

Виталий Булгаров бундан аввал Трансформерлар, Терминатор фильмлари ҳамда  Starcraft 2 ва World of Warcraft компьютер ўйинлари учун 3D-моделларни яратган. Кейинчалик уни робот дизайни ва эрогономикаси устида ишлашга таклиф қилишди. 

Лойиҳанинг асосий вазифаси — саноатда амалий қўллаш учун роботлаштирилган платформани яратиш. Роботнинг айнан қайси соҳаларда қўлланилиши ҳозирча номаълум. Булгаровнинг сўзларига кўра, у янги лойиҳага оид тафсилотлар билан бўлиша олмайди. Ҳозирга қадар роботнинг олдинга ҳаракатланиб, қўлларини қимирлата олишигина маълум. 

Бундай турдаги роботлар япон фильмлари, ўйинлари ва комиксларида жуда машҳур.