Ироқ ҲҲК Мўсул аҳолисига миллионлаб мактубларни ташлади

Ироқ ҳарбий-ҳаво кучлари Мўсул шаҳри аҳолисига далда бериш мақсадида 4 млн саҳифани ташлади. ИШИД жангарилари томонидан эгаллаб олинган шаҳарни қайтариб олиш учун Ироқ ва АҚШ етакчилигидаги халқаро коалиция ҳарбий амалиётларни давом эттирмоқда. Бу ҳақда АҚШ Марказий қўмондонлиги маълум қилди. 

«Мўсул шаҳри аҳолисига ҳамдардлик ва қўллаб-қувватлаш сўзлари битилган мактублар Ироқнинг бошқа ҳудудларидаги фуқаролари томонидан битилган. Ушбу ташаббус икки йилдан ортиқроқ вақтдан бери ИШИД томонидан эгаллаб олинган Мўсул аҳолиси яккаланиб қолмагани, уларни унутишмагани ҳамда Ироқнинг барча аҳолиси шаҳар билан қайта бирлашишни кутаётганини англатади», — дейилади Америка қўмондонлиги хабарида. 

Ушбу кампания октябрь ойи ўрталарида бошланган эди. Ироқ аҳолиси турли далда бўлувчи мактубларни юборишган ва улар 4 млн нусхагача кўпайтирилган. 

Таъкидланишича, Мўсулни озод қилиш бўйича ҳарбий амалиёт икки ойдан кўпроқ вақтдан бери давом этмоқда.