"Олтин глобус" бошловчиси Трампни "Тахтлар ўйини" қаҳрамонига қиёслади

Америкалик ҳажвчи Жимми Фэллон 74 - "Олтин глобус" киномукофотини топшириш маросими очилишида АҚШнинг янги сайланган президенти Дональд Трампни "Тахтлар ўйини" сериалидаги қирол Жоффри Баратеонга қиёслади. Бу ҳақида The Hill нашри хабар берди. 

"Кўпчиликда савол туғилади - қирол Жоффри ҳаёт бўлганда нима бўлар эди? Буни 12 кундан кейин билиб оламиз", - деди Фэллон (20 январда Дональд Трампнинг инагурацияси бўлиб ўтади).

Маросим давомида кино ривожига қўшган ҳиссаси учун мукофот олган актриса Мэрил Стрип ҳам республикачини танқид қилди. У Трампнинг жисмоний жиҳатдан носоғлом журналист Серж Ковалескига пародиясини эслатиб ўтди. 

"Мамлакатимиздаги бош лавозимни эгаллаш учун курашган инсон ногирон мухбирнинг устидан кулди", - деди у. Актриса бу лавҳа унга қаттиқ таъсир кўрсатганини таъкидлади, "чунки бу фильмда эмас, ҳаётда рўй берди". 

"Олтин глобус" киномукофотининг 74-маросими 8 январь куни Лос-Анжелесда бўлиб ўтди. "Жимми Фэллон билан кечки шоу" телекўрсатуви орқали танилган Фэллон киномукофотга бошловчилик қилди.