Жанубий Корея оғир саноатида ишлашни хоҳлаганларга виза бериш осонлашади

Жанубий Кореяда таҳсил олаётган хорижлик талабалар, агар мамлакатнинг асосий саноат соҳаларида ишлашни хоҳласа, талабалик визасини ишчи визага ўзгартириб олишига рухсат берилади. Бу ҳақда Корея Савдо-саноат ва энергия вазирлиги хабарига асосланиб Yonhap ахборот агентлиги маълум қилган.

Бугунги кунда аксарият ишчилар асосан енгилроқ ва юқори маош тўланадиган ишларга мурожаат қилаётгани сабабли оғир саноат ишчи кучи етишмаслигидан азият чекмоқда. Шу муносабат билан Жанубий Корея ҳукумати ишчи кучи тақчиллигига барҳам бериш мақсадида маълум тоифадаги ишлаб чиқариш соҳаларида меҳнат қилиш учун ишчи виза бериш тартиби осонлаштирилишини маълум қилди.

Маҳаллий коллежларда ҳукуматнинг касб-ҳунар дастури бўйича таҳсил олаётган 120 нафар хорижликка биринчи бўлиб янги виза тартиби жорий этилади. Вазирликнинг маълум қилишича, Корея коллежларида таҳсил олаётган чет элликлар мурожаатлари 13 январга қадар қабул қилиниб, январь охиригача виза бериш тартиби якунланади.