Тожик-афғон чегарасида 10 мингдан ортиқ жангари тўплангани маълум бўлди

Тожикистон ички ишлар вазири маълумотларига кўра, Афғонистоннинг Тожикистон билан чегарага яқин ҳудудида 10 минг жангари бир жойга тўпланган.

Мамлакат ички ишлар вазири Рамазон Раҳимзода журналистларнинг Афғонистон томондаги тожик-афғон чегарасида ҳозир қанча жангари бўлиши мумкинлиги ҳақидаги саволга – тахминан 10-15 минг, деб жавоб қайтарган.

«Биз аниқ рақамларни келтира олмаймиз, бироқ уларнинг сони 10-15 минг киши атрофида бўлиши мумкин. Афғонистондаги вазият мураккаблигича қолмоқда. Бу барчани ташвишга солаётгани ҳеч кимга сир эмас», - дея таъкидлаб ўтди ИИВ раҳбари.

Шу билан бир қаторда, унинг қўшимча қилишича, Афғонистонда Тожикистоннинг турли террорчилик ташкилотлари сафига кирган фуқаролари ҳам бор. «Бироқ у ерда фақатгина Тожикистон фуқаролари эмас, балки кўплаб мамлакатлардан келган кишилар бор. Афғонистон ҳуқуқни муҳофаза қилиш органлари ходимлари у ерда кечаю кундуз ишлар олиб бормоқда, аммо вазият жуда оғир», - деди вазир.

У Тожикистон томони чегарани тўлиқ назорат остида ушлаб турганини айтиб ўтган.