Танаси ранги турли эгизак опа-сингиллар ижтимоий тармоқларни забт этди

АҚШнинг Иллинойс штатида яшовчи 25 ёшли Уитни Мейер исмли она томонидан эгизак қизлари Кэлани ва Жэранининг фейсбукда жойлаштирилган суратлари оммалашиб кетди. Шундан кейин бу ёқимтой опа-сингиллар ҳақида кўплаб АҚШ ОАВ маълумот бера бошлади.

Хўш, бу эгизаклар нимаси билан шунчалик танилиб кетибди, дерсиз? Гап шундаки, бу эгизакларнинг танаси ранги турлича. Қизларнинг онаси оқ танли, отаси Томас Дин эса қора танли афроамерикаликдир. Қизлардан бири Кэлани онасига ўхшаб оқ танли ва мовий кўзли, унинг эгизаги Жэрани эса отаси каби қора танли ва жигар ранг кўзли бўлиб туғилган. 

Қизлар онасининг айтишича, унинг ажойиб қизчалари ирқчилик бўлмаслиги кераклигининг тирик рамзидир. "Уларнинг танаси турли рангда бўлса ҳам, қони бир ва биз уларни бир хилда яхши кўрамиз. Биз бир оиламиз ва уларнинг танаси рангига эътибор бермаймиз", деб айтди аёл People журналига берган интервьюсида. 

Аёлнинг айтишича, қизчалар 2016 йил 23 апрелда дунёга келишганда у турмуш ўртоғи билан қизларнинг танаси рангидаги фарқни кўриб ажабланган. Ота-она Кэлани оқ танли бўлгани учун унда альбинизм бор деб ўйлашган.

Генетик олимларнинг айтишича, қизчаларнинг ҳолати камдан-кам учрайди. Турли тухум ҳужайрадан дунёга келган қизлар ота-оналаридан кўз ва тана рангига жавоб берувчи турли генлар гуруҳини насл қилиб олишган. Бундай ҳолат юз бериши имконияти 500 тадан биттага тўғри келади.

Қизлар онасининг айтишича, ҳозирда 9 ойлик қизчалар нафақат ташқи кўриниш, балки феъл-атвор билан ҳам ажралиб туришади. Кэлани серғайрат ва ҳар қаерда эмаклашни  яхши кўради, Жэрани эса босиқроқ ва ҳозирча эмакламайди ва қўлда ўтиришни хуш кўради.

Қизчаларнинг 7 ёшлик Тэлан исмли акалари бор. У ҳар куни жажжи сингилчаларига ухлашларидан олдин эртак айтиб беришдан толмайди.