Туркия президенти ИҲТнинг 13-саммитида иштирок этади

Фото: Anadolu

Туркия президенти Ражаб Тоййиб Эрдўған Покистонга расмий ташриф билан йўл олди. Турк давлати раҳбари маҳаллий вақт билан соат 12:00да Истанбулдан Исломободга парвоз қилган. Бу ҳақида "Анадолу" нашри хабар берди.

Эрдўған Исломободдаги Иқтисодий ҳамкорлик ташкилоти (ИҲТ)нинг 13-саммитида иштирок этади.

Отатурк халқаро аэропортида давлат раҳбарини Туркия буюк миллий мажлиси (парламент)нинг раис ўринбосари Аҳмад Ойдин, Истанбул провинцияси губернатори Васип Шаҳин, полиция бошқармаси бошлиғи Мустафо Чалишкан, Адолат ва тараққиёт партиясининг Истанбул бўлими раиси Салим Темуржий ва бошқа расмий вакиллар кузатиб қолишди.

Туркия президентининг Покистондаги ташрифи давомида унга турмуш ўртоғи Амина Эрдўған, иқтисодиёт вазири Нихат Зейбекчи, энергетика ва табиий ресурслар бўйича вазир Барот Олбайроқ, транспорт, кемасозлик ва коммуникация вазири Аҳмад Арслон, ҲК бош штаби бошлиғи Хулуси Акар ҳамроҳлиқ қилишмоқда.