Тошбақа шўрва ва қурбақали рагу - Жакарта экзотикаси

Индонезиянинг қоқ марказида судралиб юрувчилар билан савдо қилинувчи бозор жойлашган. "Анадолу" агентлиги шу ҳақидаги маълумоти билан бўлишди.

Бозор Жакартанинг хитойликлар даҳасида жойлашган. Бу ерда истаган одам тошбақалар, қурбақалар, шиллиқуртлар ва илонларни харид қилиши мумкин.

Қоидага кўра, бозор маҳсулотларини асосан хитойликлар харид қилишади, зеро улар қурбақали рагулар ва тошбақа шўрваларни севиб истеъмол қилишади.

Хитойликлардан ташқари, бундай таомларни ёқтирувчи индонезияликлар ҳам бозорга тез-тез келиб туришади.

Менюсида Хитой таомлари бўлган ресторан ва қаҳвахоналар ходимлари ҳам бу бозордаги судралиб юрувчиларни харид қилишади.

Хитойликлар судралиб юрувчилар гўшти соғлиқ учун фойдали эканига ишонишади. Уларнинг фикрича, илон қони аллергияни даволайди, қурбақалар гўшти эса жигар касалликлари учун айни муддао.

Олти килограмм вазнга эга тошбақа бозорда 5 долларга сотилмоқда, илон эса - 3 доллар атрофида.

Таъкидлаш жоизки, Индонезия аҳолисининг 4 фоизга яқини хитойликлардан иборат.