Канадалик 97 га кирганини 500 метр баландликдан сакраш билан нишонлади

Канадалик Гарри Уэйлен ўзининг 97-туғилган кунини Торонтода жойлашган CN Tower биносидан сакраш билан нишонлади. Унга қизи ва икки нафар набираси ҳамроҳлик қилган. Бу ҳақда CBC News хабар бермоқда. 

Уэйлен учун 500 метрли бинодан сакраш машқи биринчиси эмас, у бундан аввал 92 ёшида ана шу бинодан арқон ёрдамида сакраган эди. У ўзининг ўшандаги суратларини Twitter’даги саҳифасига жойлаштирган.

Канадаликнинг айтишича, у узоқ йиллар қурилиш соҳасида ишлаган. Айниқса, осмонўпар бинолар қурилишида. Шунинг учун у баландликдан қўрқмаслигини таъкидлаган.

Уэйленнинг саломатлиги яхши, бу ҳам унга хавфли машғулотига ёрдам берган. “Сўнгги бор қачон аспирин истеъмол қилганимни эслолмайман”, — деди у.

Канадалик 100 ёшини ҳам ҳудди ана шундай нишонлаш ниятида.