Одамлар яшайдиган 14 ноёб уй (фотожамланма)

Ғаройиб уйларни қуриш имкониятлари турганда зерикарли бетон "қутилар"да яшашга не ҳожат? Бу саволга жавобни ҳамма ўзича излайди. Дунёда кўримсиз стандартларга риоя қилмасликка қарор қилган одамлар ҳам бор, улар ўзлари учун мисли кўрилмаган уйларни барпо қилишган. Trendymen 14 ноёб уй суратлари ва улар ҳақидаги маълумотлар билан бўлишди.

Ғордаги уй

Швейцария

Ғорда яшаш қадимги одамларга хос бўлган, бироқ бугунги кунда ҳам бундай ғаройиб жойда яшашни хуш кўрувчилар топилади. Бу уй Швейцариядаги кичик Вальс қишлоғида қурилган ва барча зарур қулайликлар билан жиҳозланган.

Шаффоф уй

Япония

Буткул шишали уй Японияда қурилган. Унда бировдан яширинишга уринмайдиган одамлар мунтазам равишда яшаб келишади - уйда нималар бўлаётганини ташқаридан  бемалол кузатиш мумкин.

Дарахтдаги сферик уй

Канада

Канадаликлар дарахтдаги классик уй ғоясини олиб, уни кейинги босқичга олиб чиқишган - ёғоч кулба ультратехнологияли сферик уйга айлантирилган.

Ғордаги уй

АҚШ

Тоғлар орасида қурилган яна бир уй Миссури штатида жойлашган. У меъморлик мўъжизасини кўришга ташриф буюрувчи сайёҳлар орасида жуда машҳур.

Тош-уй

Португалия

Юз йилча аввал исми номаълум португалиялик ишбилармон икки улкан тош орасида уй қурган. Бугунги кунда тош-уй дунёнинг энг диққатга сазовор обидалари қаторига киради ва минглаб сайёҳларни ўзига жалб қилиб келади. Тош-уйда одамлар доимий истиқомат қилиб келади - юз йилдан ошиқ вақт давомида бу ерда электр энергияси ва иссиқ сув пайдо бўлган.

Дарё устидаги уй

Сербия

Дарёдаги уй — ёлғизллик ва сокинлик истаганлар учун мукаммал жой. Сербиядаги Дрина дарёси ўртасидаги тош устига қурилган бу уй ноёб кўринишга эга бўлиш билан бир қаторда яшаш учун қулайликлар билан ҳам таъминланган.

Чиғаноқ-уй

Мексика

Чиғаноқ шаклида бунёд этилган бу эртакнамо уйда кичик ёшли фарзандлари бўлган оила яшайди. Бундай ажойиб уй ўз эгаларига завқ бағишлайди.

Тескари уй

Россия

Кўзларингиз сизни алдамаяпти - тескари уй ҳақиқатан мавжуд, у Красноярскда жойлашган.

Қоятошдаги уй

Руминия

Юмшоқ тоғ жинсининг ўзидан ишланган қадимий уй Украина ва Руминия чегарасидаги Буковина ҳудудида жойлашган.

Қуёшли уй

Франция

Страсбургда жойлашган бу ғаройиб уй қуёш соатлари каби ҳаракатланиш учун яратилган. У ёзда сояда қолиб кетиб, қишда эса офтобга йўналади.

Ҳалокат ёқасидаги уй

Швейцария

Уй Швейцария тоғларида, денгиз сатҳидан бир неча километр баландликда қурилган. У нафақат бошни айлантирадиган тепаликда жойлашган, балки унда яшовчилар учун ҳам анча хавфли - уйнинг ичига кириш учун жарлик устидаги ингичка йўлдан ўтиш керак бўлади.

Қамиш-уй

Польша

Икки бино ўртасидаги ингичка кулранг чизиқни кўряпсизми? Аслида бу кенглиги бир метрдан-да кичик бўлган тўлақонли уйдир.

Ёлғиз уй

Исландия

Ушбу кичик уй Исландиядаги Эллидей оролида жойлашган. Уй бир қарашда ёлғиз қолгандек тасаввур уйғотса-да, сершовқин қўшниларни ёқтирмайдиганлар учун айни муддаодир.

Пўлат уй

Техас

Уй эгаси Роберт Бруно Техас штатидаги ушбу уйни қуриш учун 23 йил сарфлади. Унга 110 тоннага яқин пўлат ишлатилган.