Qualcomm компанияси Хитойда iPhone ишлаб чиқариш тақиқланишини талаб қилмоқда

АҚШнинг чиплар ишлаб чиқарувчи Qualcomm компанияси интеллектуал мулк бўйича Пекин судига Хитойда iPhone ишлаб чиқарилишини тақиқлаш талаби билан  мурожаат қилди. Компания Apple’ни унинг технологияларини ҳақ тўламаган тарзда қўллашда айбламоқда. Бу ҳақда Bloomberg ахборот агентлиги хабар бермоқда. 

"Apple Qualcomm томондан яратилган технологияларни қўллаб, уларга пул тўламаяпти", деб айтди Qualcomm матбуот котиби Кристин Тримбл.

Qualcomm’нинг энг таниқли маҳсулотлари Snapdragon сериясидаги процессорлар ҳисобланади. Бу процессорлар замонавий смартфон, планшетларнинг аксариятида ва бошқа қурилмаларда қўлланади. Qualcomm даромадининг анчагина қисми, шунингдек, замонавий телекоммуникация тизимлари асосида ётган ихтиролардан патентларга тўғри келади. 

Apple ва Qualcomm ўртасидаги қарама-қаршилик 2017 йил бошида бошланган. Ўшанда Apple Qualcomm‘ни лицензиялашнинг адолатсиз амалиётини қўллаш, чипларга нархларни ҳаддан ташқари ошириш ва бозор етакчиси мақомини суиистеъмол қилишда айблаб, унга қарши аксилмонопол шикоят берган. Шундан кейин кўп ўтмай Apple Qualcomm’га лицензия тўловларини тўламай қўйган.