Эронда зилзила қурбонлари хотирасига мотам эълон қилинди

Эрон ҳукумати 14 ноябрни Эрон-Ироқ чегарасида юз берган вайронкор зилзила қурбонлари хотирасига миллий мотам куни деб эълон қилди. Бу ҳақда IRNA ахборот агентлиги хабар берди.

Аввалроқ Эроннинг зилзиладан энг кўп талофат кўрган Кирманшоҳ вилоятида 3 кунлик мотам эълон қилинганди.  

Европа-Ўрта ер денгизи сейсмологик маркази маълумотларига кўра, 12 ноябрда Эрон-Ироқ чегарасида 7,2 ва 7,3 магнитудали кетма-кет иккита кучли зилзила содир бўлган. Туни билан такрорий зилзилалар тўхтамаган: 4,9 магнитудагача бўлган 20 та афтершок қайд қилинган.

Охирги маълумотларга кўра, Эронда зилзила оқибатида 450 га яқин одам ҳалок бўлган, 7 минг одам жароҳат олган. Ироқда 7 одам ҳалок бўлгани, 530 дан кўпроқ одам жароҳат олгани маълум қилинган.