Фаластинда 2018 йил охиригача президентлик сайловлари ўтказилади

Қоҳирада 2 кунлик учрашувга йиғилган Фаластиннинг сиёсий ҳаракатлари вакиллари 2018 йил охиригача Фаластинда президентлик ва парламент сайловларини ўтказишга келишиб олишди. Бу ҳақда учрашув якунларига бағишланган баёнотда айтилган.

“Марказий сайлов комиссияси ва манфаатдор томонларга президентлик, парламент сайловларини 2018 йилдан кеч бўлмаган муддатда бир вақтда ўтказиш учун барча тайёргарлик ишларини амалга ошириш топширилсин”, дейилган ҳужжатда.

Бир қатор давлатлар, жумладан АҚШ ва Исроил томондан террорчилик ташкилотлари қаторига киритилган ХАМАС ҳаракати санкциялар, ташқи дунёдан яккаланиш, ҳарбий ихтилофлар шароитида Ғазо секторида 10 йилдан бери ҳокимиятни бошқариб келмоқда. ХАМАСнинг сиёсий рақиби – ФАТҲ ҳаракати эса халқаро ҳамжамият томондан қўллаб-қувватланувчи Фаластин миллий маъмурияти институтлари орқали Иордан дарёсининг Ғарбий соҳилини назорат қилади.