Фото: Белградда қонли дерби

Сербия чемпионатининг 22-тури доирасида, Белграднинг «Партизан» ва «Црвена Звезда» жамоалари ўртасида кечган (1:1) дерби учрашуви вақтида оммавий муштлашув келиб чиқди. Муштлашув оқибатида ўнлаб кишилар жароҳатланган. Улар орасида 4 нафар полициячи ҳам бор.

Эътиборли жиҳати, жанжал икки рақиб жамоа мухлислари ўртасида эмас, «Партизан» фанатларининг («гробарейлар») икки гуруҳи ўртасида рўй берган. Вазиятга полиция аралашган, безорилар ҳибсга олинган.

Мухлислардан бирининг бел қисмига пичоқ билан жароҳат етказилган, айни вақтда у шифохонада қолмоқда.

Маълум қилинишича, «Маракана» стадионининг «Партизан» фан клуби жойлашган жанубий трибунаси «Алькатрас» гуруҳига тегишли бўлиб, шу куни «Янг бойз» бандаси бу жойни улардан тортиб олишга ҳаракат қилган. Якунда можаро қонли тус олган. Тўқнашув вақтида пиротехника воситалари қўлланган. Баъзи безориларни трибунадан яланғоч ҳолда чиқариб юборишган. Полиция вазиятга аралашиб, исёнчи фанатларни олиб кетган.