Ит билан тенглаштирилган Бэннон Трампдан узр сўради

АҚШ президенти Дональд Трампнинг собиқ маслаҳатчиси Стив Бэннон Майкл Вульфнинг Оқ уй ҳақидаги янги китобида эълон қилинган ўз баёнотлари учун узр сўради. Бу ҳақда Axios хабар бермоқда.

Вульфнинг «Олов ва ғазаб: Трампнинг Оқ уйида» китобида Бэннон кичик Дональд Трампнинг руслар билан 2016 йилги учрашувини «сотқинлик» деб атаган. Шундан сўнг Трамп собиқ маслаҳатчиси «ақлдан озгани» ҳақида маълум қилди.

Энди эса Бэннон президент ва унинг ўғлидан узр сўрашга қарор қилди. Унинг сўзларига кўра, кичик Трамп – «ватанпарвар ва яхши одам», руслар билан учрашув ҳақидаги изоҳлари эса Пол Манафортга тегишли бўлган.

«Мен кичик Дон Трампга тегишли бўлган номақбул хабарлар бўйича жавобим президентнинг тарихий ютуқларидан эътиборни ўзига тортганидан афсусдаман», - дея қўшимча қилиб ўтган Бэннон.

Эслатиб ўтамиз, аввалроқ Дональд Трамп твиттердаги саҳифасида ўзининг стратегик масалалар бўйича собиқ маслаҳатчиси Стив Бэннонни ит билан тенглаштиргани хабар берилганди.