Ferrari йўлтанламас ишлаб чиқаради  

Ferrari компанияси йўлтанламас ишлаб чиқаришга қарор қилди. Бу ҳақда Детройт автосалони доирасида Fiat Chrysler Automobiles альянси раҳбари Сержио Маркионне маълум қилди.  

“У Ferrari йўлтанламаси каби бўлади ва шу билан бирга Ferrari каби бошқарилиши керак”, деб айтган Маркионне. Унинг айтишича, бу машина ўз синфида энг тезкори бўлади. Ҳозир бу ном Lamborghini Urus’га тегишли бўлса-да, Маркионне асосий рақобатчиси сифатида Alfa Romeo Stelvio Quadrifoglio’га ишора қилди.

650 от кучига эга Lamborghini йўлтанламаси 100 км/соат тезликка 3,6 сонияда эришади, максимал тезлиги 305 км/соатга етади. 510 от кучига эга Stelvio Quadrifoglio эса 100 км/соат тезликка 3,8 сонияда эришади, максимал тезлиги 285 км/соатга етади.

Дастлабки маълумотларга кўра, Ferrari йўлтанламаси GTC4 Lusso модели базасида қурилади, тўлиқ привод ва юришга қарши йўналишда очилувчи эшиклар билан жиҳозланади. Машина 8 цилиндрли двигатель ёки ҳаттоки гибрид куч қурилмаси олиши мумкин.

Янги машина 2019 йил охири-2020 йил бошида сотувда пайдо бўлади.