Трамп Давос йиғилишида Фаластинга таҳдид қилди

Швейцарияда Давос халқаро иқтисодий форумининг навбатдаги йиғилиши ўтказилмоқда. Унда қатнашаётган АҚШ президенти Дональд Трамп навбатдаги чиқиши билан барчанинг диққатини ўзига қаратди.

У Исроил билан тинчлик ўрнатишга ҳаракат қилмас экан Фаластинга ёрдам беришни тўхтатиб қўйиши мумкин эканини таъкидлаган. Бунга сабаб қилиб, фаластинликлар АҚШ вице-президенти Майк Пенсни қабул қилишдан бош тортганини келтирди.

Декабрда Исроилда бўлган Пенс Фаластин раҳбарлари билан учрашмоқчи бўлганди, лекин Фаластин Трампнинг Қуддусни Исроил пойтахти деб тан олганига исён тарзида Америкалик сиёсатчини қабул қилмаслигини маълум қилганди.

«Улар бизнинг ажойиб вице-президентимизни қабул қилишдан бош тортиб, АҚШни ҳақорат қилишди. Нима, биз шундай ҳолатда ҳам уларга иқтисодий ёрдам кўрсатишни давом эттиришимиз керакми? Биз бераётган пуллар Фаластинда тинчлик тикланиши учун ишлатилаётгани йўқ. Исроил эса минтақада тинчлик ўрнатишга уринмоқда», дея Трампнинг сўзларини келтиради Reuters.

АҚШ бу ойда Фаластинга кўрсатилаётган ёрдам миқдорини 125 миллион доллардан 65 миллион долларга тушириб қўйиши мумкин. Трампнинг айтишича, у Иерусалимни тўлиқлигича Исроил пойтахти деб тан олгани учун Исроил қандайдир тўловни амалга оширади: «Бу жуда яхши иш бўлади» деган Трамп гап нима ҳақида кетаётганини очиқламай.