АҚШ президенти самолётига ўрнатиладиган янги совуткичлар нархи маълум қилинди 

АҚШ президенти самолётига ўрнатиладиган янги совуткичлар деярли 24 млн долларга айланади. Бундан Пентагоннинг давлат харидлари маълумотлар базаси дарак бермоқда. 

Boeing компанияси 2017 йил декабрда VC-25A G12/G13 моделидаги совуткичларни лойиҳалаш, ишлаб чиқариш, ўрнатиш ва синовдан ўтказишга 23,7 млн долларлик буюртма олган. 

Defense One порталининг маълум қилишича, “биринчи рақамли борт”га ўрнатиладиган совуткичларга қўйиладиган талаблар ҳам ўзгачадир. Самолётга ўрнатиладиган 5 та катта совуткич 25 тадан кўпроқ бўлмага эга бўлиши, унда камида 3 мингта тушлик сақланиши керак. Бундай кўп миқдордаги таом самолётдаги барча одамларни бир ҳафта давомида егулик билан таъминлаш учун керак. Бу уруш каби кутилмаган вазиятлар учун қилинади.

Самолётда ҳозирда қўлланадиган совуткичлар президент самолёти Boeing 747 фойдаланишга киритилган 1990 йилда ўрнатилган.

АҚШ ҳарбий-ҳаво кучлари вакили Энн Стефанек шу давр ичида совуткичларнинг ишончлилиги анча камайганини айтган.