Видео: Америкалик фристайлчи ҳаммани алдади

Венгрия терма жамоасини тақдим қилувчи 33 ёшли америкалик фристайлчи Элизабет Суэйни Пёнгчангдаги Олимпиаданинг хаф-пайп – чанғи фристайли бўйича мусобақаларида охирги ўринни эгаллади. Спортчидан ушбу спорт тури учун хос бўлган турли элементларни бажариш талаб этилган, бироқ у бундай элементлардан бирортасини бажармаган. 

Аниқланишича, Суйэни Олимпиадада иштирок этиш учун ҳуқуқни қўлга киритишда унча ҳам ҳалол йўл тутмаган.  

Маълум бўлишича, Суэйни аслида профессионал спортчи эмас. У Олимпиадага танлов тизими мукаммал эмаслиги сабабли бора олган. Қоидаларга кўра, Олимпиадага йўлланма олиш учун спортчи бир неча халқаро мусобақаларда етакчи ўттизталикка кира олиши керак бўлган.

Суйэни эса атайлаб иштирокчилар сони 30 тадан кам бўлган мусобақаларда иштирок этган. Баъзида унинг рақиблари ўз уринишлари вақтида йиқилиб тушишган ва америкалик охиргидан юқорироқ ўринларни олишга ҳам муваффақ бўлган.   

Венгрия чанғи жамоаси вакиллари улар Пёнгчангга келгунча Суэйнининг учишини бирор марта кўришмаганини тан олишган. Уларнинг айтишича, аёл Олимпиадага ўз ҳисобидан келган.

Қуйида Суэйнининг Олимпиададаги иштироки намойиш қилинган. Спортчи ўз уринишини битта-иккита номигагина сакрашлар билан бажарган. 

Таққослаш учун ушбу йўналишда 1-ўрин олган канадалик Кэсси Шарп қандай иштирок этганини ҳавола қиламиз.