99 ёшли австралиялик сузувчи янги рекордни ўрнатди

Австралиялик сузувчи Жорж Коронс 99 ёшида 50 метр масофага сузиш мусобақасида рекорд ўрнатди.

100-104 ёшлилар гуруҳида иштирок этган қария масофани 56,12 секундда сузиб ўтди, деб хабар беради BBC.

Жорж 2018 йил апрель ойида 100 ёшга тўлади. У мусобақада ёлғиз ўзи иштирок этди ва 2014 йилда ўрнатилган, 1 дақиқа 31 сонияга тенг бўлган аввалги рекордни янгилашга муваффақ бўлди.

Мусобақадан сўнг, Коронс эришган натижасидан мамнун эканини айтди. Шунингдек, уни қўллаб-қувватлаб турган мухлисларга миннатдорчилик билдирди.

Спортчи ёшлигида профессионал сузувчи бўлганини, бироқ, Иккинчи жаҳон уруши бошлангач, бу ишини ташлаб қўйганини, фақат 80 ёшга кирганида яна бассейнга қайтганини айтди.

Энди Жорж 3 март куни 100 метрга сузиш бўйича мусобақада иштирок этади. У 3 дақиқа 23 сонияга тенг бўлган рекордни янгилашга жиддий бел боғлаган.