Трамп ваъдасида турди – пўлат ва алюминий импортига бож жорий этилди

АҚШ президенти Дональд Трамп Қўшма Штатларга пўлат ва алюминий олиш киришга тарифлар жорий этиш ҳақидаги фармойишни имзолади. Бунда Мексика ҳамда Канада истисно саналади, Вашингтон ушбу икки давлат билан Шимолий Америка эркин савдо ҳудуди (NAFTA) бўйича келишув шартларини қайта кўриб чиқиш ҳақида келишмоқда. 

АҚШ президентининг сўзларига кўра, пўлат олиб киришга 25 фоиз ва алюминийга 10 фоизлик миқдорда бож жорий этилмоқда. Божхона тарифлари 15 кундан сўнг амал қилишни бошлайди, дея аниқлик киритди Трамп.

«Ўз уйи фаровонлигини ҳимоя қилмайдиган давлат, хорижда ҳам ўз манфаатларини ҳимоя эта олмайди», - дея маълум қилди Трамп. Шунингдек, у кучли пўлат қуйиш ва алюминий саноатини «бизнинг миллий хавфсизлигимиз учун ҳаётий муҳим», деб атаган.

Америка саноати, Трампнинг фикрича, бошқа давлатлар томонидан ташқи савдо юритишнинг «тажовузкор усуллари сабабли кучсизланган».

Трамп мисол тариқасида Tesla ва SpaceX асосчиси Илон Маскнинг твитини келтирди. Аввалроқ Маск Twitter’да Хитойга Америка автомобилларини олиб киришга 25 фоизлик, Хитой маҳсулотини АҚШга олиб киришга эса – 2,5 фоизлик бож борлиги ҳақида ёзганди. «Буни Илон ёзди, бироқ буни ҳамма билади, - деди Трамп. – Улар (собиқ президентлар) йиллар давомида билишган, лекин ҳеч нарса қилишмаган. Бу ўзгариши керак». Bloomberg маълумотларига кўра, Илон Маск Хитой ҳукумати билан у ерда Tesla ишлаб чиқариш қувватларини ишга тушириш борасида келишувга эриша олмаган.

Бироқ АҚШ президентининг қайд этишича, Вашингтон тарифларни ўзгартиришга очиқ ва ҳаттоки уни алоҳида мамлакатлар учун бекор қилишга тайёр. Хусусан, Трамп «бизга савдо масалаларида ҳалол муносабатда бўладиган» давлатларга тарифларни бекор қилишга ваъда берган.