Перу суди собиқ президентга мамлакатни тарк этишни тақиқлади

Перулик судья Хуан Карлос Санчес Бальбуэна прокуратура талабини бажарган ҳолда, собиқ президент Педро Пабло Кучинскини мамлакатни тарк этишига тақиқ қўйди.

Айни пайтда, собиқ сиёсатчи устидан Бразилиянинг Odebrecht қурилиш компаниясидан олган тўловлари билан боғлиқ коррупция иши юзасидан тергов ишлари давом этмоқда.

Маълум бўлишича, 2004-2013 йиллар давомида Кучинскига тегишли фирмалар Odebrecht компаниясидан «консультация хизматлари» учун $4,8 млн олган. Собиқ давлат раҳбари бу хабарларни инкор қилиб келмоқда. 

Шу пайтгача, бош прокуратура бу иш юзасидан Кучинскини икки марта сўроқ қилган. Бундан ташқари, унга тегишли бўлган уйларда тинтув ўтказган.

Жума куни Перу Конгресси Кучинскини мамлакат президенти лавозимидан истеъфосини қабул қилган эди. Айни пайтда, унинг ўрнини биринчи вице-президент Мартин Вискарра эгаллаган.