Агротехника тадбирлари энди GPS навигация орқали назорат қилинади

Қишлоқ хўжалигини ўз вақтида қишлоқ хўжалиги техникаси билан таъминлашга доир қўшимча чора-тадбирлар тўғрисида ҳукумат қарори қабул қилинди. Бу ҳақда “Инсон ва қонун” нашри хабар бермоқда.

Мазкур қарорда 2018 йилда туманлар кесимида қишлоқ хўжалиги техникасини етказиб беришнинг қўшимча ҳажмлари параметрлари, шунингдек, уларни молиялаштириш ва етказиб беришнинг графиклари, буюртмалар портфелини шакллантириш ва шартномалар тузиш, қишлоқ хўжалиги техникасини ишлаб чиқариш ва етказиб беришни молиялаштириш, шунингдек, қишлоқ хўжалиги товар ишлаб чиқарувчиларига механизациялашган хизмат кўрсатиш ишларини ташкил этиш схемалари тасдиқланди. 

Қарорга кўра — 2018 йил 1 ноябрдан бошлаб:

етказиб бериладиган ўзи юрар қишлоқ хўжалиги техникаси амалга оширилаётган агротехника тадбирларини реал вақт режимида назорат қилиш имконини берувчи замонавий автоматлаштирилган навигация ва мониторинг (GPS навигация) тизими билан жиҳозланишини таъминланади.

2020 йил 1 январгача эса:

“Ўзагросервис” АЖ машина-трактор паркларининг барча ўзи юрар қишлоқ хўжалиги техникаси навигация ва мониторинг (GPS навигация) тизими ҳамда ҳисобга олишнинг бошқа техник воситалари билан жиҳозланади.

Шунингдек, тренер-инструкторларни, қишлоқ хўжалиги техникаси операторларини, шунингдек, уларни таъмирлаш бўйича мутахассисларни тайёрлаш, қайта тайёрлаш ва уларнинг малакасини ошириш бўйича ўз полигонига эга бўлган модель ўқув марказини ташкил этиш;

касб-ҳунар коллежларида замонавий қишлоқ хўжалиги техникасини бошқариш бўйича мутахассислар тайёрлаш учун ўқув режалари ва дастурларини ишлаб чиқиш;

операторларни янги турдаги қишлоқ хўжалиги техникасида ишлаш учун қайта тайёрлаш ва уларнинг малакасини ошириш, шунингдек, қишлоқ хўжалиги техникасидан фойдаланиш ва уларга сервис хизматлари кўрсатиш бўйича мутахассислар учун ҳудудий курслар ташкил этилиши юзасидан масъул мутасаддилар томонидан ҳукуматга таклифлар киритилиши белгиланган.