АҚШ Туркияга иқтисодий санкциялар киритиш билан таҳдид қилмоқда 

АҚШ вице-президенти Майк Пенс агар Туркия 2016 йил кузидан бери ушлаб турган америкалик пастор Эндрю Брансонни озод қилиш бўйича зудлик билан чоралар кўрмаса, Анқарага қарши иқтисодий санкциялар киритиш билан таҳдид қилди. 

“Агар Туркия бу беайб одамни озод қилиш бўйича зудлик билан чоралар кўрмаса ва уни уйига қайтармаса, АҚШ Туркияга қарши жиддий иқтисодий санкциялар киритади”, деб айтган Пенс Вашингтонда ўтган диний эркинликлар анжуманида.

Пенснинг айтишича, “АҚШ маъмурияти пасторнинг озод қилиниши бўйича тинимсиз иш олиб бормоқда” ва унинг уй қамоғига ўтказилишини ижобий қаршиласа ҳам, бироқ буни етарли деб ҳисобламайди.

“Президент Трамп ва мен унинг озодлиги учун курашамиз. У турмада бўлмаса-да, бироқ ҳали озодмас”, деб таъкидлаб ўтган Пенс.

Туркия суди қарорига кўра Брансонга Туркия ҳудудини тарк этиш ман қилинган. Унинг иши бўйича кейинги суд жараёни 12 октябрга белгиланган.  

Америкалик пастор Туркия томонидан Фатҳулла Гуленнинг ФЕТО ташкилотига шериклик қилиш, Туркияда тақиқланган Курдистон ишчи партиясини қўллаб-қувватлаш айблови билан ушлаб турилибди. Брансон унга қўйилаётган айбловларни инкор қилиб, уларни “шармандали ва жирканч” деб атамоқда.