«Реал» Ковачични «Челси»га қўйиб юборади

«Реал» ярим ҳимоячиси Матео Ковачич «Челси»га ўтиши кутилмоқда.

Marca нашри маълумотига кўра, томонлар ушбу 24 ёшли ҳавбекнинг ижараси бўйича келишувга эришган.

Бироз олдинроқ ушбу нашр хорватиялик футболчи Мадрид клуби сафида машғулотларда иштирок этишдан бош тортгани ва келажаги масаласига ойдинлик киритишни талаб этаётгани ҳақида хабар тарқатганди.

«Реал» Ковачични сотишдан кўра ижарага беришни афзал кўрган, футболчи кейинроқ жамоага керак бўлиши ҳисобга олинган.

Футболчи трансфери яқин вақтлар ичида эълон қилиниши кутилмоқда.

Бундан аввалроқ, Қироллик клуб «Челси»дан дарвозабон Тибо Куртуани олмоқчи экани ҳақида хабар тарқалганди. Ушбу бельгияилик футболчи ҳам Мадридга ўтишни истамоқда ва у ҳам жамоа машғулотларини бойкот қилган.