Honda янги самолётини буюртмачиларга етказиб бера бошлади

Honda компаниясининг HA-420 HondaJet самолётининг янги версияси – HA-420 HondaJet Elite жорий йилнинг май ойида Женевадаги EBACE кўргазмасида тақдим қилинганди. 

Honda’нинг авиасозлик бўлими Honda Aircraft’нинг маълум қилишича, энди компания ушбу самолётни буюртмачиларга етказиб бера бошлади. Илк самолёт америкалик буюртмачига етказилган. Компанияда таъкидланишича, жорий йилнинг 1-ярмида буюртмачиларга самолётнинг аввалги версияси HondaJet’дан 17 та дона етказилган.

Flying нашрининг ёзишича, янги модел каттароқ парвоз масофаси (2661 км), Garmin G3000 негизидаги такомиллашган асбоблар панели олган. Шунингдек, Elite янги рангларда тақдим қилинган. 

Honda’нинг маълум қилишича, янги самолёт АҚШ фуқаролик авиацияси федерал бошқармаси ва Европа авиация хавфсизлиги агентлиги томонидан сертификатлаштирилган.

Компаниянинг илк серияли ишлаб чиқаришга мўлжалланган самолёти HondaJet’нинг характеристикалари қуйидагича бўлган: йўловчилар сони – 7 киши, узунлиги 12,52 метр, қанотлари қулочи 12,2 метр, баландлиги 4,01 метр, бўш самолёт вазни 3267 кг, максимал тезлиги 782 км/соат.