Карлос Кейруш ЎФА билан музокаралар ҳақидаги саволга жавоб беришни истамади

11 сентябрь куни Тошкентда Эрон миллий терма жамоасига қарши бўлиб ўтадиган ўртоқлик учрашуви олдидан матбуот анжумани ўтказилди. 

Анжуман давомида Эрон терма жамоаси бош мураббийи Карлуш Кейрушдан у ва Ўзбекистон футбол ассоциацияси ўртасидаги музокаралар бўйича сўралди. Аммо португалиялик мураббий бу савол ўта шахсийлиги учун унга жавоб беришни истамади.

«Бу шахсий савол. Мен эса шахсий ҳаётимдаги воқеаларни матбуотга ошкор қилаверишни истамайман. Музокаралар бўлганми, йўқми, буни айтмайман. Лекин бир фикрни ошкор қилишим мумкин, Ўзбекистон Эктор Куперни олиб келиб жуда ҳам тўғри қарор қабул қилди.

Эрондан бошқа жамоалар билан ўйинда ўзбекистонликларга омад тилайман.

Биз Эрон футбол федерацияси билан янги шартнома тузганимиз йўқ. Биз федерация билан ҳақиқий эркаклар каби келишувга эришганмиз. Буни қоғоздагина расмийлаштириш қолган», дея Кейрушнинг сўзларини келтирмоқда «Трибуна» мухбири.

Эслатиб ўтамиз, 2017 йил сентябрида Самвел Бабаян Ўзбекистон миллий терма жамоаси бош мураббийлигидан истеъфога чиқарилгач, 2018 йил августигача терма жамоа бош мураббийсиз қолди. Ўтган давр мобайнида Ўзбекистон футбол ассоциацияси бу лавозим учун кўплаб номзодларни кўриб чиқди. ОАВда энг кўп тилга олинган ном 2011 йилдан буён Эронни бошқариб келаётган Карлуш Кейруш бўлди. Шу йилнинг январида Карлуш Кейруш билан музокара ўтказилаётгани тўғрисида дастлабки хабарлар тарқалганди. Февралда эса музокаралар ижобий якунлангани ва томонлар келишувга эришгани хабар қилинди. Май ойида эса Миллий олимпия қўмитаси президенти, ЎФА вице-президенти Умид Аҳмаджонов терма жамоага терма жамоаси билан жаҳон чемпионатида иштирок этадиган мутахассис мураббий бўлиши, янги мураббий жаҳон чемпионатидан кейин таништирилиши ҳақида айтди. Жаҳон чемпионати якунланганидан бир ой вақт ўтиб, турнирга Эрон терма жамоасини бошлаб борган Карлуш Кейруш эса, Миср терма жамоаси билан ишлаган Эктор Купер Ўзбекистон МТЖнинг янги мураббийи бўлиши маълум бўлди.