Франция Google'дан қамоқхоналар суратини ўчиришни сўради

Франция адлия вазири Николь Беллубэ Американинг Google компаниясидан Google Maps сервисидан аҳлоқ тузатиш муассасалари тасвирини ўчиришни сўради. Бунга рецидивист Редуан Фаиднинг вертолётда қамоқхонадан қочгани сабаб сифатида кўрсатилган, дея маълум қилади RTL радиостанцияси.

Франциянинг энг катта қидирувдаги жиноятчиси Редуан Фаид ўтган ҳафта ҳибсга олинган, у деярли уч ой қочиб юрган. 

"Мен Google'дан ахлоқ тузатиш муассасаларини ўчиришга доир чоралар кўришни сўрадим, ҳозирча бунга ҳеч қандай жавоб берилмади", - деди Беллубэ радиотанцияга берган интервьюсида. Вазир бундай муассасаларнинг харитада кўрсатилишини тўғри деб ҳисобламаслигини қўшимча қилган. 

Таъкидлаш жоизки, Фаид 1 июль куни Париж остидаги Сена ва Марна департаменти қамоқхонасидан қочиб кетган. У ахлоқ тузатиш муассасасини Бельгияда рўйхатдан ўтган вертолётда тарк этган. Кейинчалик вертолётни Парижнинг бошқа чеккасида ёниб кетган ҳолда топишди. Беш йил аввал ҳам Фаид қамоқхонадан қочишнинг уддасидан чиққанди. Ўшанда у қамоқхона деворини портлатиб, муассасанинг бир неча ходимини гаровга олганди.