Буюк Британия ва Бельгия бош вазирларининг кортежи ЙТҲга учради

Буюк Британия ва Бельгия бош вазирларининг кортежи Бельгиянинг Монс шаҳрига олиб борадиган йўлда ЙТҲга учради. VRT телеканалининг хабар қилишича, фахрий қоровулнинг икки полициячи-мотоциклчиси жароҳатланган.

Derniere heure газетасининг аниқлашича, ҳукумат раҳбарлари кортежи олдидаги машинанинг кутилмаганда кескин тўхташи натижасида тўқнашув содир бўлган. Кортеждаги мотоциклчилар тўхташга улгурмаган ва олдинда тўхтаган машинага келиб урилишган. Улар касалхонага ётқизилган.

Бош вазирларнинг кортежи сўнгра Монс шаҳрига ҳаракатланишда давом этган. Бу ерда Биринчи жаҳон уруши якунланганлигининг 100 йиллиги муносабати билан Сен-Симфорьен ҳарбий қабристонида маросим бўлиб ўтади. Маросимдан сўнг бош вазирлар 11 ноябрь куни асосий тадбирлар бўлиб ўтадиган Францияга йўл олишади.