Samsung’нинг катта смартфонларидан фойдаланиш янада қулай бўлади

Samsung компаниясининг ишлаб чиқарувчиларга мўлжалланган тақдимотида иккига букланувчи смартфон билан бирга йирик экранли қурилмаларда фойдаланишга мўлжалланган One UI интерфейси ҳам намойиш этилди. 

Янги интерфейс икки қисмга ажратилган: Viewing Area - “томоша қилиш соҳаси” - дисплейнинг юқори қисмида (барча муҳим маълумотлар унда акс этади) ва Interaction Area – “ўзаро таъсир доираси” дисплейнинг пастки қисмида.

Шунингдек Samsung белгилар ва ёқиш-ўчириш тугмаларнинг ташқи кўринишини ўзгартирди ҳамда кўп элементлар бурчакларини смартфондан бир қўлда фойдаланиб, босиш учун янада қулай қилди. 

Компанияда маълум қилинишича, One UI интерфейси фойдаланувчига диққатни жамлаш имконини тақдим этиб, чалғитувчи омиллардан халос қилиш мақсадида ишлаб чиқилган.

One UI интерфейсини қўллаб-қувватловчи Android 9 Pie бета-версиясидан шу ой охирига яқин АҚШ, Германия ва Жанубий Кореяда, кейинроқ – Европа ва Осиёнинг бошқа мамлакатларида  фойдаланиш мумкин. Galaxy S9, S9 Plus ва Note9 учун One UI релизи 2019 йилнинг январига мўлжалланган.