Смартфон синишининг энг кенг тарқалган сабаби аниқланди

Американинг техника таъмирлови билан шуғулланувчи SquareTrade компанияси АҚШдаги смартфонларнинг бузилиши билан боғлиқ энг кенг тарқалган сабабларни келтирди. Тадқиқот натижалари ҳақида PhoneArena хабар берди. 

Маълум қилинишича, АҚШдаги фойдаланувчиларининг 66 фоизи смартфон синиши билан тўқнашган, бундан 29 фоизи телефонлар экрани синиши натижасида мурожаат қилган. Шундай қилиб, бир йилда Америкада 50 миллиондан ортиқ экран синган, уларни таъмирлашга кетган умумий сумма эса 3,4 миллиард долларни ташкил қилади. Қайд этиш жоизки, экран синган тақдирда, фойдаланувчиларнинг 34 фоизи шишани алмаштиришдан воз кечади, 27 фоизи эса смартфон ғилофдан фойдаланиш вақтида синганини айтади. 

Шунингдек, фойдаланувчилар устахоналарга тирналган экран (27 фоиз), аккумулятор бузилиши (22 фоиз) ҳамда экран ишламаслиги (16 фоиз) ва корпус бурчакларининг уриниши (16 фоиз)дан шикоят қилиб мурожаат қилишади. 74 фоиз ҳолатда телефонни таъмирлашга олиб келишга смартфоннинг ерга тушиши сабаб бўлади.