Москва метросида Ўзбекистон фуқароси ҳалок бўлди

Фото: Ижтимоий тармоқлар

27 ноябрь куни Москва метросининг «Юго-Западная» бекатида йўловчи рельсларга тушиб кетди ва ҳалок бўлди. Бу ҳақда ИИБнинг Москва метрополитенидаги матбуот хизмати хабар қилган.

«Тахминан соат 16:45лар атрофида «Юго-Западная» метро бекатида йўловчи иштирокида фожиа юз берди. Ўзбекистон Республикасининг 25 ёшли фуқароси кириб келаётган электропоезд остига тушиб кетди», - деди ИИБ матбуот котиби Алексей Мишляев.

Воқеа жойига етиб келган тиббиёт ходимлари жабрланувчи ҳалок бўлганини аниқлашди, ҳуқуқни муҳофаза қилиш органлари ходимлари гувоҳларни сўроқ қилишган.

Метрополитен Twitter’да «Юго-Западная» бекатида йўловчи билан фожиа юз берганини хабар қилди. Шунинг учун Сокольническая йўналиши жанубий участкасида поездлар ҳаракати интервали оширилди, «Юго-Западная», «Румянцево», «Саларьево» ва «Проспект Вернадского» бекатлари эса вақтинча ёпилди. Кейинчалик бекатлар нормал иш режимини тиклади.

Мишляевнинг аниқлик киритишича, бекатлар «эскалатор ва платформада одамлар тўпланмаслиги мақсадида» ёпилган.

#Москва #метро