Кичик кулбадаги улкан қалб эгаси бугун уйлик бўлди

Kun.uz сайти турли хайрия акцияларини ташкил этиш, ёрдамга муҳтож юртдошларимизга кўмаклашишга қаратилган туркум кўрсатув ва мақолаларни ўқувчилар эътиборига ҳавола этиб келмоқда. Уларнинг натижаси эса қувонарли. Яъни, халқимизнинг саховатпешалиги ва яхшиликлари мусибат остонасида турган кўплаб ютдошларимизнинг ҳаёт йўлида маёқ, дардига дармон, ғам-андуҳига чора бўлмоқда. 

Кичик кулбадаги улкан қалб эгаси эсингиздами? Тошкент шаҳри, Зангиота туманидаги кичик бир кулбада хат-ҳужжатлардан нусха кўчириш хизматини йўлга қўйиб кун кўраётган Муроджон Саидмаҳмудов ҳақида лавҳа тайёрлаган эдик. Ижтимоий тармоқларда кўплаб муҳокама бўлган бу лавҳа ортидан кейинчалик турли саволлар ва ҳатто кўнгилни хира қилувчи гаплар ҳам чиққанди. Бироқ, шунга қарамай, Муроджон яхшиларнинг кўмаги билан кесилган оёқларига протез қўйиш учун Туркияга отланди. У ерда бир муддат даволанди ва оёқлари учун протез қўйдирди. Шундан сўнг, у киши ҳақида биз эшитмадик. Куни кеча эса Мурод ака янги уйга ўтганлигини, юртдошларимизга яна бир бор раҳмат айтмоқчилигини билдирди. Биз бундан чексиз қувондик ва манзил сари бордик, дилдан суҳбат қурдик.

Mover.uz'да кўриш

YouTube'да кўриш

«Kun.uz сайтида эълон қилинган хайрия акцияси орқали оёқли, уйли бўлдим. Аллоҳ ўзи сабабчи бўлиб юборган хайрия ташкилотчилари ва унда иштирок этган барча юртдошларимизга миннатдорчилик билдираман.

Туркияда уч ой мобайнида муолажалар олиб, ниҳоят протез қўйдирдим. Юриш учун вазнимни камайтириш ҳам керак бўлди, шу сабаб ошқозоним учун ҳам жарроҳлик амалиёти ўтказилди. Шундан сўнг Ўзбекистонга қайтдим.

Ватанга қайтгач ҳар турли машқлар орқали юришни ўрганаяпман.
Шукр, ҳаётим секин-секин ўз изига тушяпти, ҳокимлик биринчи бадалини тўлаб уй олиб берди. Тадбиркорлик ишим ҳам юриб турибди (ҳужжатлардан нусха кўчириш). 

Яқинда шаҳар ҳокимлигига илтимос билан мурожаат қилмоқчиман. Озиқ-овқат дўкони ташкил этиб, халқимизга хизмат қилиш ниятидаман.

Юртдошларимизга айтадиганим: ҳеч қачон бугунги куни билан яшамасинлар, ҳаёт жуда қисқа, эртанги кунимизда нима бўлишини билмаймиз, шу сабабли фақат яхши амаллар қилишсин, муҳтожларга ёрдам берсинлар. Ҳаётида қандайдир қийинчилик бўлса, тушкунликка тушмай режалар тузиб, унинг ижобати сари интилсинлар. Хайрияда иштирок этганларга минг раҳмат». 

Тошкент шаҳар ҳокимлиги кўмаги билан янги уй билан таъминланган Мурод ака бугун кўзида ёш билан барчага раҳмат айтди. У ўтмишдаги хатоларидан тўғри хулоса чиқариб, эртанги кун учун тузилган янги режалар ижобати йўлида ҳаракат қилмоқда. Унинг кулбаси энди ёруғ ва шинам хонадонга айланди.