Хитой Канададан Huawei директорининг озод қилинишини талаб қилмоқда

Хитой Канададан Huawei Technologies компанияси молиявий директори Мэн Ваньчжоунинг озод қилиниши ва унинг ушланиши сабабини тушунтиришни кескин шаклда талаб қилди. Бу ҳақда Хитой ташқи ишлар вазирлиги матбуот котиби Гэнг Шуанг маълум қилди.

Huawei компанияси асосчисининг қизи, компания молиявий директори Мэн Ваньчжоу Канада полицияси томонидан 1 декабрда Ванкуверда ҳибсга олинганди. ОАВда таъкидланишича, аёл Эронга қарши санкциялар бузилиши билан боғлиқ ҳолда АҚШ мурожаати билан ушланган. Айни вақтда АҚШ Мэн Ваньчжоунинг экстрадиция қилинишига уринмоқда.   

Хитой ташқи ишлар вазирлиги вакилининг таъкидлашича, юз берган воқеа АҚШ билан технологиялар масаласида кескинликни янада оширади ва икки томонлама савдо музокараларини мураккаблаштиради.