Трампнинг собиқ адвокатига уч йиллик қамоқ жазоси берилди

АҚШ президенти Дональд Трампнинг собиқ адвокати Майкл Коэн бир қатор жиноятлар, жумладан президент кампанияси вақтидаги молиявий қоидабузарликлар ва Трамп билан жинсий яқинликда бўлганини таъкидлаган икки аёлга сукут сақлаш учун пул тўлаганлик учун 3 йиллик қамоқ жазосига тортилди. Коэнга, шунингдек, 2 млн долларлик жарима солинган.  

Адвокатнинг ўзи аввалроқ молиявий қоидабузарликлар, солиқ фирибгарликлари содир этиш ва АҚШ конгрессига ёлғон кўрсатмалар беришдаги айбини тан олган.

Коэн суд йиғилишида Трамп уни “ёвузлик йўлидан боришга” мажбур қилганини ва Трампга содиқлиги унинг заиф томони бўлганини айтган.

“Мен кўчмас мулк компаниясига ишлаш таклифини олиб хато қилганман. Трамп мени твиттерда “заиф” деб атади ва у ҳақ бўлган, бироқ менинг заифлигим қалбим амрини эшитмай, унинг ишларини яшириш мажбуриятим деб ўйлаганим бўлган”, деб айтган Коэн сўнгги сўзида ва кўзига ёш олган.

“Мен АҚШ халқи олдида узр сўрайман – у ҳақиқатни билишга лойиқ”, деб қўшимча қилган Коэн.