Трампнинг собиқ адвокати АҚШ президентига ишонмасликка чақирди 

АҚШ президенти Дональд Трампнинг собиқ адвокати, сайлов қонунчилигини бузгани учун 3 йиллик қамоқ жазосига маҳкум қилинган Майкл Коэн Трампнинг суд ишига алоқадормаслиги ҳақидаги сўзларини рад этди ва унга ишонмасликка чақирди.

Нью-Йорк суди 12 декабрда Коэнни сайлов кампанияси ҳақидаги қонунни бузгани учун уч йиллик қамоқ жазосига маҳкум қилди. Коэн аввалроқ сайлов кампанияларини молиялаштириш ҳақидаги қонунни бузиш, Трампнинг буйруғи билан у билан жинсий алоқада бўлган аёлга сукут сақлаши учун пул беришда воситачилик қилиш, солиқларни тўлашдан бўйин товлашда айбдор эканини тан олган. 

Коэнга ҳукм чиқарилгач, Трамп собиқ адвокатига қонунни бузишни буюрмаганини айтган. АҚШ президентининг таъкидлашича, унинг сайлов кампанияси молиялаштирилиши Коэннинг ишига тааллуқли бўлмаган. 

“Унга кимдир ишонади, деб ўйламайман. Биринчидан, Trump organization’да бирорта иш жаноб Трамп қўлидан ўтмагунча амалга оширилмайди. У менга тўловларни амалга ошириш, бу масалаларда иштирок этишни буюрган”, деб айтган Коэн ҳукм чиқарилгандан кейин ABC News телеканалига берган интервьюсида. 

Коэн Трамп унинг хатти-ҳаракатлари қонунга зидлигини билгани ва тўловлар шубҳасиз унга ва компаниясига ёрдам бериш мақсадида амалга оширилганини таъкидлаб ўтган.

“Ҳақиқат шундаки, америкаликлар ва бутун дунёдаги одамлар у айтаётганларга ишонмайди. Бу одам ёлғон гапирмоқда. Афсусланарлиси, унинг ифлос ишлари учун мен жавоб беришим керак”, деб қўшимча қилган собиқ адвокат. Коэн бошловчининг Трамп “Россия иши” бўйича олиб борилаётган тергов ҳақида рост гапираётгани ёки йўқлиги ҳақидаги саволга “йўқ” дея жавоб берган. 

“Мен садоқат қилишга нолойиқ одамга садоқатли бўлганман”, деб таъкидлаб ўтган Коэн.