Индонезияда Boeing 737 Max самолётининг ҳалокати сабаби маълум қилинди

Индонезиянинг Lion Air авиакомпаниясининг янги Boeing 737 Max самолётининг ҳалокатига тезлик датчигининг нотўғри созлангани сабаб бўлган бўлиши мумкин. Бу ҳақда The Wall Street Journal манбаларга иқтибос келтирган ҳолда маълум қилди. Самолёт октябрда ҳалокатга учраганди.

Манбаларнинг маълум қилишича, ҳалокатдан икки кун аввал механиклар самолётга янги тезлик датчигини ўрнатишган. Бироқ унинг созланиши нотўғри амалга оширилган бўлиши мумкин. Датчик борт компьютерига самолёт тумшуғининг уфқ чизиғига нисбатан ҳолати ҳақидаги маълумотларни узатади.   

Boeing ҳавога кўтарилгандан кейин датчикдан нотўғри маълумотлар узатила бошланган. Бу эса ҳалокатга олиб келган бир қатор ҳодисаларга туртки бўлган бўлиши мумкин. Терговчиларнинг фикрича, датчикнинг нотўғри созлангани самолёт шўнғимаслиги учун унинг тумшуғини тўғрилашга ҳаракат қилувчи автоматик ёрдамчи тизимнинг ўчирилишига олиб келган. Ҳалокат олдидан учувчилар тизимнинг буйруқларига халақит қилиш учун зарур қадамларни амалга оширишга 20 мартага яқин ҳаракат қилишган.

Бироқ Lion Air эгаларидан бири Русди Кирана тезлик датчиги тўғри созланган бўлганини айтган. Ҳалокатнинг тергови яна бир неча ой вақт олади.