Мексикада мэр ўз лавозимини бажаришга киришгандан 1,5 соат кейин отиб кетилди

Мексиканинг Оахака штатидаги Эройка-Сьюдад-де-Тлахьяко шаҳри мэри Алехандро Апарисио лавозимини бажаришга киришгандан 1,5 соат кейин мэрияга кетаётганда йўлда отиб кетилди. 

Маълум қилинишича, воқеа 1 январь эрталаб юз берган. Апарисио мэр лавозимини бажаришга киришгандан кейин мэрияга йиғилишга кетаётганда номаълумлар томонидан ҳужумга учраган. 

Мэр ҳужумдан кейин шифохонага етказилган, бироқ олинган жароҳатлардан ҳалок бўлган. Таъкидланишича, ҳужум вақтида яна 4 киши яраланган. 

Қотиллик бўйича тергов бошланган, ҳозирда бир гумонланувчи ушланган. 

Мексика наркокартеллар ўртасидаги уруш майдонига айланган. 2016 йилда мамлакат қотилликлар сони бўйича (23 минг қотиллик) дунё бўйича 2-ўринни эгаллаган. Бу борада Мексикадан 2011 йилдан бери фуқаролик уруши кетаётган Суриягина (60 мингта қотиллик) олдинда бўлган. Мексика ҳукумати уюшган жиноятчиликка 10 йил аввал уруш эълон қилган вақтдан бери тахминан 200 минг мексикалик ўлдирилган, 30 минги бедарак йўқолган.