«Бернабеу»да инқироз. Солари ҳеч нарсани ўзгартиролмади

Испания чемпионатининг 18-турида «Реал» ўз майдонида янги бош мураббий бошқарувидаги жамоадан 2та жавобсиз гол қабул қилиб олди.

«Реал» - «Реал Сосьедад» - 0:2 (0:1)
Голлар: Виллиан Жозе, 3 - пенальти (0:1). Пардо, 83 (0:2).
Реал: Куртуа, Серхио Рамос, Марселу (Регилон, 77), Варан, Карвахаль, Модрич, Кроос (Себальос, 80), Каземиру (Иско, 57), Бензема, Васкес, Винисиус Жуниор.
Реал Сосьедад: Рульи, Морено, Льоренте, Элустондо (Сальдуа, 69), Айен Муньос (Субельдия, 84), Сурутуса, Ильярраменди, Мерино (Пардо, 73), Виллиан Жозе, Янузай, Оярсабаль.
Огоҳлантиришлар: Виллиан Жозе, 36. Васкес, 40. Марселу, 52. Модрич, 75. Иско, 88.
Четлатиш: Васкес, 61.
Ҳакам: Мунуэра Монтеро.
6 январь. Мадрид. «Сантьяго Бернабеу» стадиони.

«Реал» 22 декабрь куни клублар ўртасидаги жаҳон чемпионатида ғолиб бўлганидан буён илк уй учрашувини ўтказди. «Реал Сосьедад»га қарши ўйин арафасида жамоа сардори Серхио Рамос мухлислар билан тўлиб-тошмаган «Сантьяго Бернабеу» стадионидаги мухлисларга совринни намойиш этди. Мадридлик мухлисларни энди ўтмишга айланган Чемпионлар лигаси ғолиблиги ҳам, «Аль-Айн»ни енгиш орқали қўлга киритилган соврин ҳам стадионга чорлай олмаяпти, мухлислар «Реал»нинг жорий мавсумдаги ўйинларидан жуда тушкун кайфиятда ва бу клубнинг чипталар сотувидан олаётган даромадини ҳам кескин камайтирмоқда.

«Реал Сосьедад» Сантьяго Солари жамоаси учун осон ўлжадек кўринганди. Басклар Мадридга ташриф буюришдан олдин Примера ўйинларида қаторасига 4 ўйинда мағлуб бўлган ва жамоа турнир жадвалида хавфли ҳудудга яқинлашиб қолганди. Лекин шуниси ҳам борки, «Реал Сосьедад» чемпионат ўйинларида сафарда очко олиш бўйича «Барселона»дан кейинги иккинчи кўрсаткични қайд этаётганди. Қолаверса, янги йилда Сан-Себастьян клуби мураббийни алмаштирди: истеъфога чиқарилган Асьер Гаритано ўрнини Иманол Альгуасиль эгаллади.

«Реал»нинг бу ўйиндаги заявкасидан Гарет Бэйл ўрин олмади. Уч кун муқаддам у «қаймоқранглилар» жамоасининг 2019 йилдаги илк ўйинида – «Вильярреал»га қарши сафар ўйинида (2:2) жароҳат олганди. Мадридга келганидан буён 22-марта жароҳатланган футболчи (жорий мавсумнинг ўзида учинчи марта, «Вильярреал»га қарши ўйин у жароҳатидан тикланганидан кейин чемпионат доирасидаги ўйинларга қайтиши бўлганди) 4 ҳафтагача майдонга туша олмайди. Уэльслик 29 ёшли футболчи «Реал»даги асосий вақтини даволаниш билан ўтказмоқда (у турли жароҳатлар туфайли жами 65 ўйинда жамоага ёрдам бера олмаган).

Бэйл ва Марко Асенсио сафдан чиқиши мураббий билан низо туфайли бошланғич таркибда анчадан буён кўриниш бермаган Искога имконият тақдим этадигандек эди. Аммо аргентиналик мутахассис ўжарлик қилишда давом этди ва бошланғич таркибда Иско эмас, 18 ёшли Винисиус Жуниор пайдо бўлди. Бу унинг Примера ўйинларида илк марта бошланғич таркибдан ўрин олиши эди. Қолаверса, у жамоа тарихига бошланғич таркибда ўйнаган 2000 йилдан кейин туғилган илк футболчи сифатида кирди.

У ўйинда қаҳрамонлик кўрсатиб, Солари ҳақлигини кўрсатиб қўйиши мумкин эди. 

Винисиус Жуниор - «Реал»нинг бу ўйиндан кейин танқид қилинмайдиган ягона футболчиси бўлди. У бир неча йилдан кейин Неймар даражасига чиқиши мумкин, ҳозирча эса у куч ва тажриба тўпламоқда. Иккинчи бўлимда майдонга туширилган Иско ҳеч нарса қила олмади.

Ўйинда мезбонларнинг хавфли ҳужумларининг аксари Жуниорнинг тезкорлиги ва дриблинглари эвазига рўй берди. У ўйин давомида 6 марта зарба берди ва 3 марта ҳал қилувчи пасни амалга оширди.

Ўйин омадсиз бошланиши (2-дақиқадаёқ Каземиро томонидан Микел Меринога ишлатилган қўполлик учун белгиланган 11 метрлик жарима зарбасини Виллиан Жозе аниқ амалга ошириб ҳисобни очди) ёш вингерни фақат ва фақат олдинга ундади. Биринчи бўлимда вазиятлардан бирида бразилиялик футболчи Карим Бенземанинг пасидан кейин дарвозабон билан яккама-якка чиқиб борди, аммо уни алдаб ўтолмади. Бошқа вазиятда эса унинг майдон марказидан рақиб дарвозаси томон интилишини ҳакамнинг тушунарсиз ҳуштаги тўхтатиб қўйди. Умуман, бу ўйиндаги ҳакамлик кўпчиликни ажаблантирди.

Хосе Мунуэра Монтеро «Реал»га иккита пенальти бермади. Биринчи вазиятда «Реал»нинг собиқ футболчиси Асьер Ильяраменди зарба беришга чоғланган Серхио Рамосни ортдан туртиб юборганида жим турди, видеотакрорларга ҳам мурожаат қилишни истамади. Иккинчи бўлимда ҳам Винисиус Жуниор меҳмонлар дарвозабони Херонимо Рульи томонидан йиқитилганини кўришни истамади. 

«Қаймоқранглилар»нинг ҳужумдаги ҳаракатлари бесамар кетаверди, энг қулай вазият Лукас Васкесда бўлганди. Лекин биринчи бўлим охирида унинг ижросидаги «парашют» зарбаси рақиб дарвозаси тўсинига тегди. Ҳакам 61-дақиқада унга иккинчи сариқ карточкани кўрсатиб, майдондан чиқариб юборганидан кейин барчаси аён бўлди - «Реал» энди бу ўйинни қутқариб қололмасди. Майдонни тарк этатуриб Васкес футболкасини йиртиб юборди.

Винисиус барчасини қўлга олишга ҳаракат қилди, унинг айланма зарбаси дарвоза тўққизлиги ёнидан ўтиб кетди.

Меҳмонлар эса қарши ҳужумлардан бирида «Реал»ни жазолашди, ўйин охирига бориб иккинчи голни уришди. Ильярраменди майдон марказида тўпни олиб қўйиб, Виллиан Жозега ташлаб берди, унинг дарвоза томон узатмасини Пардо осонлик билан голга айлантирди.

«Реал» 2004 йил майидан буён илк марта ўз майдонида «Сосьедад»га ютқазди. 

«Реал» яна қийин аҳволда, худди Мадридга яна Лопетеги қайтгандек. Бу жамоа худди ўзининг ёшлигидаги жасоратларини ва қаҳрамонликларини қайта ва қайта эслатаверадиган, лекин энди ҳеч нарсага ярамай қолган қарияга ўхшайди. Ҳурмат ва ачиниш: Соларининг ҳозирги жамоасига қараб шундай туйғуларни ҳис қилиш мумкин. Аргентиналик мутахассис «Реал» билан яхши бошлаганди, лекин энди барчаси ўз жойига қайтгандек. Примеранинг 18 турида 6 марта мағлуб бўлган мадридликлар чемпионлик ҳақида ўйлай олишмайди.

Примерадаги бирорта жамоа бунчалик катта фарқни йўққа чиқара олмаган ва чемпион бўлолмаган. Испания чемпионати тарихида пешқадамдан 9 очкодан ортиқ фарқ билан орқада қолган жамоалар якунда 1-ўринни қўлга киритолмаган.