Германия Россиядан Керчь бўғози орқали кемаларни эркин ўтказишни талаб қилди

Германия ташқи ишлар вазири Хайко Маас Россиядан Керчь бўғози орқали кемалар доимий равишда эркин ўтишини таъминлашини талаб қилди. Бу ҳақда Reuters хабар бермоқда.

Аввалроқ Россия ТИВ раҳбари Сергей Лавров билан мулоқот якунида у айни пайтда Керчь бўғозидан кемалар эркин ўтаётганини билдирганди.

Tages Spiegel нашрининг билдиришича, вазир кемалар эркин ўтишини ҳужжат билан тасдиқлаш кун тартибида қолаётганини айтган.

Ўтган йилнинг 25 ноябрида Украина ҳарбий-денгиз кучларининг учта кемаси Россия чегарасини бузгани учун ушланганди. Кемалардаги 24 украиналик денгизчи Россия чегарасини бузишда айбланиб, ҳибсга олинган.

Украина Россиянинг ҳаракатларини тажовузкорлик деб топиб, бир қатор вилоятларида 30 кунлик муддатга ҳарбий вазият тартиби киритган, Москва эса воқеани иғво деб баҳолаганди.