Милан-Лондон-Мадрид. Европада трансфер учбурчаги

Бугун Европада уч нафар форвард янги клубларида тиббий кўрикдан ўтиши кутилмоқда.

Аргентиналик форвард Гонсало Игуаин айни вақтда Миландан Лондонга йўл олган, у «Челси» сафида тиббий кўрикдан ўтади ва янги клуби билан шартнома тузади. Трансфер ҳуқуқи «Ювентуса»га тегишли бўлган аргентиналик ҳужумчи мавсумнинг биринчи қисмини ижара асосида «Милан»да ўтказди. Эндиликда лондонликлар уни «Юве»дан мавсум охиригача 9 миллион еврога ижара олмоқда, келишувга кўра, 6 ойдан кейин уни 36 миллион евро эвазига тўлиқ харид қилишлари мумкин.

Ўз навбатида испаниялик ҳужумчи Альваро Мората «Челси»ни тарк этади ва ўзининг ёшликдаги жамоаси «Атлетико»га қайтади. Мадридликлар уни кейинчалик 55 миллион еврога сотиб олиш ҳуқуқи билан ижарага олишмоқда.

Ва ниҳоят «Милан» Игуаин ўрнини «Женоа»нинг польшалик тўпурари Кшиштоф Пентек билан тўлдирмоқда. Унинг трансфери «россонери» учун 35 миллион еврога тушади.