Мадуро Трампга Венесуэла ишларига аралашмаслик ҳақидаги мурожаатни имзолади

Венесуэла президенти Николас Мадуро ва унинг рафиқаси Силия Флорес АҚШ президенти Дональд Трампга Венесуэла ишларига аралашмаслиги талаб қилинган мурожаатни имзолади. 

7 февралда Мадуро рафиқаси ҳамроҳлигида имзоларни тўплаш пунктларидан бири жойлашган Боливар де Каракас майдонига келган. Мурожаатга аввал Мадуро, кейин рафиқаси имзо қўйган.

“Бугун биз тинчлик учун имзо чекдик ва ҳар куни уни муҳаббат, сабр ва қатъиятлик билан, Николас Мадуро билан ягона фронт бўлиб ҳимояламоқдамиз”, деб ёзган Силия Флорес твиттерда.

Акциядан мақсад АҚШнинг Венесуэла ишларига аралашишига қарши 10 млн.та имзо тўплаш ҳисобланади.

Айни вақтда Венесуэлада сиёсий инқироз давом этмоқда. Мамлакатда давом этаётган иқтисодий таранглик ортида парламент спикери Хуайн Гуайдо ўзини вақтинчалик президент деб эълон қилган.