Мадуро Венесуэла тарихидаги энг йирик ҳарбий машғулотларга старт берди

Фото: РИА Новости / Стрингер

Венесуэла президенти Николас Мадуро 10 февраль кундузи мамлакат тарихидаги энг йирик фуқаролик-ҳарбий машғулотлари – “Ангостуранинг икки юз йиллиги 2019”га старт берди. Унда қуролли кучлардан ташқари, халқ қўшинлари ҳам иштирок этади.

Машғулотлар олдидан Мадуро пойтахт Каракас яқинидаги Миранда штатига келиб, ҳарбий техника намуналари билан танишди.

Машғулотлар 10 февралдан 15 февралгача ўтади. Мадуро ўз нутқида таъкидлаганидек, бу машғулотлар мамлакатнинг 200 йиллик тарихидаги энг йириги бўлади.

Машғулотлар 1819 йил 15 февралда Симон Боливар ташаббуси билан Венесуэланинг испан ҳукмронлигидан озод қилинган вилоятлари пойтахти бўлган Ангостурада чақиртирилган конгресснинг 200 йиллигига бағишланган. Ўшанда конгресс Венесуэланинг мустақиллигини эълон қилиб, Боливарни вақтинчалик президент этиб тайинлаган.

Мадуро иккинчи президентлик муддатига киришиш вақтида мамлакат ҳарбий қудратини ошириш билан шуғулланишини таъкидлаб ўтганди.

Тайёрлаган Шуҳрат Раҳимов

#Венесуэла #ҳарбий машғулотлар

Венесуэла президент Николас Мадурога қарши оммавий норозилик намойишлари гирдобида қолди. 23 январь куни, ушбу намойишлар авжига чиққан вақтда Венесуэла парламенти раҳбари Хуан Гуайдо ўзини мамлакатнинг муваққат президенти деб эълон қилди