Трампнинг собиқ адвокати уни фирибгар ва ирқчи деб атади

АҚШ президенти Дональд Трампнинг собиқ адвокати, солиқ фирибгарликлари ва АҚШ конгрессига ёлғон  кўрсатмалар бергани учун судланган Майкл Коэн вакиллар палатасидаги жараёндаги кириш нутқида Трампни фирибгар ва ирқчи деб атади.

Коэн ўз кўрсатмаларида Трамп ундан порноактриса Сторми Дэниелсга ишқий муносабатлари ҳақида сукут сақлаши учун 130 минг доллар беришни ва бу ҳақида рафиқаси Мелания Трампга ёлғон сўзлашни сўраганини маълум қилди. Трамп 2017 йил президентлиги вақтида Коэнга компенсация тариқасида пул ўтказиб берган. Адвокат конгрессга чеклардан бирининг нусхасини тақдим қилди.   

Коэннинг айтишича, у 2016 йил июлда Трампнинг сиёсий маслаҳатчи Рожер Стоун билан телефон орқали суҳбатини эшитган. Стоун суҳбатда WikiLeaks асосчиси Жулиан Ассанж унга Трампнинг президент сайловлари бўйича рақиби Хиллари Клинтонга зиён етказадиган мактублар архивини эълон қилишини маълум қилганини айтган. Коэннинг айтишича, Трамп бу янгиликни ижобий қаршилаган.   

Коэн Трампни ирқчи деганининг далили сифатида Трамп қора танли сайловчилар унга овоз бермасликлари, чунки улар “жуда аҳмоқлар” деган сўзларини эслаб ўтган.

Коэннинг таъкидлашича, Трамп Американи эмас, балки ўз брендини “буюк қилиш” учун президент бўлишга қарор қилган ва ғалаба қилишни режалаштирмаган – сайлов кампанияси унга “маркетинг имконияти” бўлган. Собиқ адвокат Трампга ишлаганидан уялишини айтган. 

Коэн, шунингдек, конгрессменлардан 2017 йил сентябрда берган ёлғон кўрсатмалари учун узр сўраган. Унинг кўрсатмалари Москвада “Трамп-Тауэр” биноси қуриш бўйича музокараларга тааллуқли бўлган. Коэн кўрсатмасига кўра, музокаралар 2016 йил январда тугаган, бироқ ҳақиқатда Трамп республикачилардан АҚШ президенти лавозимига ягона номзод бўлиб қолган вақтгача, яъни ёзгача давом этган.

Конгресснинг назорат бўйича қўмитасининг республикачи аъзолари демократлар Коэнни “президент ҳақида ёлғон сўзлашни давом эттириши” учун таклиф қилишганини айтишган. Уларнинг фикрича, демократлар Коэннинг кўрсатмаларини Трампни истеъфога чиқариш учун қўллашни режалаштиришмоқда.