Покистон асирга олинган ҳинд учувчисини ватанига қайтармоқда

Фото: Radio Pakistan

Покистон 27 февраль куни ҳаво жангидан сўнг асирга тушган ҳиндистонлик учувчини қайтариб беради. ОАВ маълумотига кўра, учувчи ҳозирда Ҳиндистон элчихонасида бўлиб, бир неча соатдан сўнг Вагах чегара масканида уни топшириш жараёни бўлиб ўтади.

Хабарларга кўра, 27 февралда Ҳиндистон ва Покистон ҳарбий авиацияси ўртасида юз берган ҳаво жангида умумий ҳисобда 32 та ҳарбий самолёт иштирок этган.

Маълум қилинишича, Покистон самолётлари Кашмирдаги туташув чизиғи бўйлаб жойлашган ҳарбий объектлар яқинидаги ҳудудни бомбардимон қилгандан кейин ҳинд учувчилари томонидан таъқиб қилинган.

Ҳиндистон авиация бўлими командири Абхинандан Вартхаман Р-73 ракетаси билан F-16’га ҳужум қилган, бироқ унинг МиГ-21 самолёти AIM-120 AMRAAM ракетаси томонидан зарбага учраган. Вартхаман катапулта қилган, бироқ покистонликлар томонидан қўлга олинган.

Ҳиндистон ва Покистон ҳарбий авиацияси ўртасидаги ҳаво жанги тафсилотлари маълум қилинди

#Ҳиндистон #Покистон #учувчи

14 февраль куни Покистон ҳудудида ўрнашган «Жайш-э-Муҳаммад» террорчи гуруҳи Кашмирда Ҳиндистон армияси ҳарбийлари колоннаси ўтаётган йўлда теракт содир этиши натижасида 46 нафар ҳинд ҳарбийси ҳалок бўлди. Бу воқеа ортидан Покистон ва Ҳиндистон муносабатларида можаро яна авж олди.