Венесуэла АҚШ нефть компаниясига 7 млрд евро тўлаб беришга мажбур бўлади

Венесуэла Американинг ConocoPhillips нефть компаниясига 8 миллиард доллардан (7,1 миллиард евро) ортиқ маблағ тўлаб бериши керак. Жаҳон банки ташкилотлари гуруҳига кирувчи Инвестицион баҳсларни тартибга солиш бўйича халқаро марказнинг тегишли қарори 8 март, жума куни эълон қилинди. 

Шу билан бирга, ушбу компания 30 миллиард долларлик (26,7 миллиард евро) товон пули талаб қилган. Каракас чиқарилган қарор устидан шикоят аризаси билан мурожаат қилиш ҳуқуқига эга.

ConocoPhillips’нинг даъвоси 2007 йилда Венесуэла томонидан Америка компаниясига тегишли учта нефть активининг миллийлаштирилиши билан боғлиқ. 2013 йилда Инвестицион баҳсларни тартибга солиш бўйича халқаро марказ Венесуэла ҳукумати хатти-ҳаракатини ноқонуний деб топди, дея таъкидлайди Deutsche Welle.

Бундан олдин, Венесуэла АҚШ устидан БМТ олий комиссарига шикоят қилмоқчи экани хабар қилинганди.

Венесуэла алоқа ва ахборот вазири Хорхе Родригеснинг хабар қилишича, мамлакат БМТнинг инсон ҳуқуқлари бўйича олий комиссари Мишель Бачелетга ўз энергетика тизимига амалга оширилган ҳужум бўйича шикоят билан чиқади.