Путин Қолмиғистонга кикбоксчи Бату Хасиковни раҳбар этиб тайинлади

Россия президенти Владимир Путин Қолмиғистоннинг ўз хоҳишига кўра лавозимидан кетган раҳбари Алексей Орлов ўрнига унинг вазифасини вақтинчалик бажарувчи этиб Бату Хасиковни тайинлади.

Эътиборлиси, Хасиков кикбоксинг бўйича жаҳон чемпиони ҳисобланади. У ўзининг юқори лавозимга тайинлангани ҳақидаги маълумотни катта иштиёқ билан қабул қилган. “Мен Россия президенти ва етакчимиз Владимир Владимирович Путинга билдирилган ишонч учун миннатдорлик билдираман. Юртдошларим ва Қолмиғистон аҳолисининг ишончи ва қўллаб-қувватловига умид қиламан. Ўзимни ишга тўлиқ бахшида этишга тайёрман. Эртадан ишни қабул қиламан”, деб айтган Хасиков.

“Бату Хасиков – кикбоксинг бўйича жаҳон чемпиони Қолмиғистоннинг вақтинчалик раҳбари этиб тайинланди. Унинг дўстона тахаллуси “Ботий хон”. ВВда [Владимир Владимирович] юмор билан барчаси жойида”, деб кинояли изоҳ берган ушбу тайинловга “Эхо Москви” раҳбари Алексей Венедиктов.

Хасиков 1980 йилда Москвада туғилган, бироқ Қолмиғистоннинг Лаган шаҳрида улғайган. 11 ёшидан карате-кёкусинкай билан шуғулланган, кейинчалик ўз кучини қўл жанги, жанговар самбо, жиу-житсу, тай боксда синаб кўрган. 2005 йилдан мунтазам асосда кикбоксинг мусобақаларида иштирок эта бошлаган.

Хасиков 2005-2010 йиллар давомида кикбоксинг бўйича Россиянинг уч карра чемпиони, Европа чемпиони, 5 та етакчи кикбоксинг ташкилотидан учтасида чемпион бўлган.

У кикбоксинг билан шуғулланиш билан параллел равишда милицияда хизмат қилган. Катта лейтенант унвонига эга.

Хасиков янги тайинловгача ёшлар ишлари бўйича федерал агентлик раҳбари маслаҳатчиси бўлиб ишлаб келган.